"श्री लक्ष्मीनारायण साधना "

श्री लक्ष्मीनारायण साधना मंत्र
।।ॐ तत्सत ।।
                       ।।नारायण हृदयम् ।।

।।हरिः ओम् ।।☀️अस्य श्रीनारायण-हृदय-स्तोत्र-महामन्त्रस्य भार्गव ऋषिः अनुष्टुप् छन्दः लक्ष्मीनारायणो देवता
नारायण प्रीत्यर्थे जपे विनियोगः ।।
☀️करन्यास
नारायणः परं ज्योतिरिति अङ्गुष्ठाभ्यां नमः ।
नारायणः परं ब्रह्मेति तर्जनीभ्यां नमः ।
नारायणःपरो देव   इति  मध्यमाभ्यां नमः ।
नारायणःपरं धामेति अनामिकाभ्यां नमः ।
नारायणः परो धर्म इति कनिष्ठिकाभ्यां नमः ।
विश्वं नारायणः इति करतलपृष्ठाभ्यां नमः ।।
☀️अङ्गन्यास:-
नारायणःपरं ज्योतिरिति  हृदयाय नमः ।
नारायणःपरं ब्रह्मेति शिरसे स्वाहा ।
नारायणः परो देव इति शिखायै वौषट् ।
नारायणः परं धामेति कवचाय हुम् ।
नारायणः परो धर्म इति नेत्राभ्यां वौषट् ।
विश्वंनारायण इति अस्त्राय फट् ।                  भूर्भुवस्सुवरोमिति दिग्बन्धः ।।
☀️।।।।अथ ध्यानम् ।।।
उद्यादादित्यसङ्काशं पीतवासं  चतुर्भुजम् । शङ्खचक्रगदापाणिं ध्यायेल्लक्ष्मीपतिं हरिम् ।।1
त्रैलोक्याधारचक्रं तदुपरि कमठं तत्र चानन्तभोगी  तन्मध्ये भूमि पद्माङ्कुश शिखरदळं कर्णिकाभूत-मेरुम् । तत्रत्यं शान्तमूर्तिम् मणिमय मुकुटं-कुण्डलोद्भासिताङ्गं  लक्ष्मीनारायणाख्यं सरसिज नयनं संततं चिन्तयामः ।।2
☀️अस्य श्रीनारायण-हृदय-स्तोत्र-महामन्त्रस्य ब्रह्मा ऋषिः, अनुष्टुप् छन्दः, नारायणो देवता, नारायण प्रीत्यर्थे जपे विनियोगः ।।
ॐ।। नारायणःपरं ज्योति-रात्मा नारायणः परः । नारायणः परं ब्रह्म नारायण नमोऽस्तु ते ।।3
नारायणः परो देवों धाता नारायणः परः । नारायणः परो धाता नारायण नमोऽस्तु ते ।।4
नारायणः परं धाम ध्यानं नारायणः परः । नारायण परो धर्मो नारायण नमोऽस्तु ते ।।5
नारायणः परो देवो विद्या नारायणः परः । विश्वं नारायणः साक्षान् नारायण नमोऽस्तु ते ।।6
नारायणाद् विधि-र्जातो जातो नारायणाद् भवः । जातो नारायणादिन्द्रो नारायण नमोऽस्तु ते ।।7
रवि-र्नारायण-स्तेजः चन्द्रो नारायणो महः । वह्नि-र्नारायणः साक्षात् नारायण नमोऽस्तु ते ।।8
नारायण उपास्यः स्याद् गुरु-र्नारायणः परः । नारायणः परो  बोधो नारायण नमोऽस्तु ते ।।9
नारायणः फलं मुख्यं सिद्धि-र्नारायणः सुखम् । हरि-र्नारायणः शुद्धि-र्नारायणः नमोऽस्तु ते ।।10
निगमावेदितानन्त-कल्याणगुण-वारिधे । नारायण नमस्तेऽस्तु नरकार्णव-तारक ।।11
जन्म-मृत्यु-जरा-व्याधि-पारतन्त्र्यादिभिः सदा । दोषै-रस्पृष्टरूपाय नारायण नमोऽस्तु ते ।।12
वेदशास्त्रार्थविज्ञान-साध्य-भक्त्येक-गोचर । नारायण नमस्तेऽस्तु मामुद्धर भवार्णवात् ।।13
नित्यानन्द महोदार परात्पर जगत्पते । नारायण नमस्ते ऽस्तु मोक्षसाम्राज्य-दायिने ।।14
आब्रह्मस्थम्ब-पर्यन्त-मखिलात्म-महाश्रय । सर्वभूतात्म-भूतात्मन् नारायण नमोऽस्तु ते ।।15
पालिताशेष-लोकाय पुण्यश्रवण-कीर्तन । नारायण नमस्ते ऽस्तु प्रलयोदक-शायिने ।।16
निरस्त-सर्वदोषाय भक्त्यादि-गुणदायिने । नारायण नमस्तेऽस्तु त्वां विना न हि मे गतिः ।।17
धर्मार्थ-काम-मोक्षाख्य-पुरूषार्थ-प्रदायिने । नारायण नमस्तेऽस्तु पुनस्तेऽस्तु नमो नमः ।।18
।।।।।अथ प्रार्थना ।।।
नारायण त्वमेवासि दहराख्ये हृदि स्थितः । प्रेरिता प्रेर्यमाणानां त्वया प्रेरितमानसः ।।19
त्वदाज्ञां शिरसा कृत्वा भजामि जन-पावनम् । नानोपासन-मार्गाणां भवकृद भावबोधकः ।।20
भावार्थकृद् भवातीतो भव सौख्यप्रदो मम । त्वन्मायामोहितं विश्वं त्वयैव परिकल्पितम् ।।21
त्वदधिष्ठान्-मात्रेण सा वै सर्वार्थकारिणी । त्वमेव तां पुरस्कृत्य मम कामान् समर्थय ।।22
न मे त्वदन्यस्त्रातास्ति त्वदन्यन्न हि दैवतम् । त्वदन्यं न हि जानामि पालकं पुण्यवर्धनम् ।।23
यावत्सांसारिको भावो मनस्स्थो भावनात्मकः । तावत्सिद्धिर्भवेत् साध्या सर्वदा सर्वदा विभो ।।24
पापिना-महमेकाग्रो दयालुनां त्वमग्रणीः । दयनीयो मदन्योऽस्ति तव कोऽत्र जगत्त्रये ।।25
त्वयाहं नैव सृष्टश्चेत् न स्यात्तव दयालुता । आमयो वा न सृष्टश्चेदौषधस्य वृथोदयः ।।26
पापसङ्ग-परिश्रान्तः पापात्मा पापरूप-धृक् । त्वदन्यः कोऽत्र पापेभ्यः त्रातास्ति जगतीतले ।।27
त्वमेव माता च पिता त्वमेव त्वमेव बन्धुश्च सखा त्वमेव । त्वमेव विद्या द्रविणं त्वमेव                                 त्वमेव सर्वं मम देव देव ।।  28
प्रार्थनादशकं चैव मूलष्टकमथःपरम् । यः पठेच्छृणुयान्नित्यं तस्य लक्ष्मीः स्थिरा भवेत् ।29
नारायणस्य हृदयं सर्वाभीष्ट-फलप्रदम् । लक्ष्मीहृदयकं स्तोत्रं यदि चैतद्विनाकृतम् ।।30
तत्सर्वं निष्फलं प्रोक्तं लक्ष्मीः क्रुध्यति सर्वदा । एतत्सङ्कलितं स्तोत्रं सर्वाभीष्ट-फलप्रदम् ।।31
जपेत् सङ्कलितं कृत्वा सर्वाभीष्ट मवाप्नुयात् । नारायणस्य हृदयं आदौ जपत्वा ततःपरम् ।।32
लक्ष्मीहृदयकं स्तोत्रं जपेन्नारायणं पुनः । पुनर्नारायणं जपत्वा पुनर्लक्ष्मीनुतिं जपेत् ।।33
तद्वद्धोमाधिकं कुर्या-देतत्सङ्कलितं शुभम् । एवं मध्ये द्विवारेण जपेत् सङ्कलितं शुभम् ।।34
लक्ष्मीहृदयके स्तोत्रे सर्वमन्यत् प्रकाशितम् । सर्वान् कामानवाप्नोति आधिव्याधि-भयं हरेत् ।।35
गोप्यमेतत् सदा कुर्यात न सर्वत्र प्रकाशयेत् । इति गुह्यतमं शास्त्रं प्रोक्तं ब्रह्मादिभिः पुरा ।।36
लक्ष्मीहृदयप्रोक्तेन विधिना साधयेत् सुधीः । तस्मात सर्वप्रयत्नेन साधयेद् गोपयेत्  सुधीः ।।37
यत्रैतत्पुस्तकं तिष्ठेत् लक्ष्मीनारायणात्मकम् । भूत पैशाच वेताळ भयं नैव तु सर्वदा ।।38
भृगुवारे तथा रात्रौ पूजयेत् पुस्तकद्वयम् ।सर्वदा सर्वदा स्तुल्यं गोपयेत् साधयेत् सुधीः । गोपनात् साधनाल्लोके धन्यो भवति तत्त्वतः ।।39
।।इत्यथर्वरहस्ये उत्तरभागे नारायण हृदय स्तोत्रं ।।
☀️श्री लक्ष्मीनारायण ☀️
☀️हरिॐतत्सत ☀️
अस्य श्री आद्यादि श्रीमहालक्ष्मी हृदय-स्तोत्र-महामन्त्रस्य भार्गव ऋषिः (शिरसी), अनुष्टुबादि नानाछन्दांसि (मुखे),
आद्यादि-श्रीमहालक्षमी सहित  नारायणो देवता (हृदये)।।  ।।ॐबीजम् , ह्रीं शक्तिः, ऐं कीलकम् ।।
आद्यादि-श्रीमहालक्षमी- प्रासादसिद्ध्यर्थं  जपे विनियोगः ।।
☀️-ॐ।।    1 "आद्यादि-श्रीमहालक्षमी  देवतयै नमः "   हृदये,
2  "श्रीं बीजायै नमः " गुह्ये,  3  " ह्रीं शक्त्यै नमः "पादयोः,
4 "ऐं  बलायै नमः " मूर्धादि-पाद-पर्यन्तं विन्यसेत् ।  5  ॐ श्रीं ह्रीं ऐं करतल-करपार्श्वयोः,
करन्यास:- 1*श्रीं अंगुष्ठाभ्या नमः ---- 2* ह्रीं तर्जनीभ्यां  3*ऐं मध्यमाभ्यां  4*  श्रीं अनामिकाभ्यां नमः  5*ह्रीं कनिष्ठिकाभ्यां नमः  6* ऐं करतलपृष्ठाभ्यां नमः ।।
ह्रदयान्यास:-
ॐ ह्रदयाय नमः ह्रीं शिरसे स्वाहा ऐं शिखायै वौषट् श्रीं कवचाय हुम् ह्रीं नेत्राभ्यां वौषट् भूर्भुवस्सुवरों इति दिग्बन्धः ।।
 ☀️अथ ध्यानम् ☀️
हस्तद्वयेन कमले धारयन्तीं स्वलीलया ।।हार-नूपूर-संयुक्तां महालक्ष्मी विचिन्तयेत् ।।
कौशेय पीतवसनां अरविन्दनेत्राम्   पद्मद्वयाभय वरोद्यत-पद्महस्ताम् ।
उद्यच्छतार्क-सदृशां परमाङ्क-संस्थां- ध्यायेत् विधीशनत-पादयुगां जनित्रीम् ।।
।। श्री लक्ष्मी-कमलधारिण्यै सिंहवाहिन्यै स्वाहा ।।
 पीतवस्त्रां सुवर्णाङ्गी पद्महस्त-द्वयान्विताम् । लक्ष्मीं ध्यात्वेति मन्त्रेण स भवेत् पृथिवीपतिः ।।
मातुलङ्ग-गदाखेटे पाणौ पात्रञ्च बिभ्रती नृपमूर्धनि।
 ☀️।।।।।।।।।।ॐ श्रीं ह्रीं ऐं ।।।।।।।।
वन्दे लक्ष्मीं परशिवमयीं शुद्धजाम्बूनदाभां , तेजोरूपां कनक-वसनां सर्वभूषोज्ज्वलाङ्गीम् ।।
बीजापूरं कनक-कलशं हेमपद्मं दधानाम्, आद्यां शक्तिं सकलजननीं विष्णु-वामाङ्कसंस्थाम्।
श्रीमत्सौभाग्यजननीं स्तौमि लक्ष्मीं सनातनीम् । सर्वकाम-फलवाप्ति-साधनैक-सुखावहाम् ।।2।।
स्मरामि नित्यं देवेशि त्वया  प्रेरितमानसः । त्वदाज्ञां शिरसा धृत्वा भजामि परमेश्वरीम् ।।3।।
समस्त सम्पत्सुखदां महाश्रियं  समस्त कल्याणकरीं महाश्रियम् ।
समस्त सौभाग्यकरीं महाश्रियं  भजाम्यहं ज्ञानकरीं महाश्रियम् ।।4।।
विज्ञानसम्पत्सुखदां महाश्रियम्  विचित्र-वाग्भूतिकरीं मनोहराम् ।
अनन्त-सौभाग्य-सुखप्रदायिनीं  नमाम्यहम् भूतिकरीं हरिप्रियाम् ।।5
समस्त-भूतान्तरसंस्थितां त्वं  समस्त-भक्तेश्श्वरि विश्वरूपे ।
तन्नास्ति यत्त्वद्व्यतिरिक्तवस्तु  त्वपादपद्मं प्रणमाम्यहं श्रीः ।।6
दारिद्रय-दुखौघ-तपोपहन्त्रि त्वत्- पादपद्मं मयि सन्निधत्स्व ।
दीनार्ति-विच्छेदन-हेतुभूतैः  कृपाकटाक्षैरभिषिञ्च मां श्रीः ।।7
विष्णु-स्तुतिपरां लक्ष्मीं स्वर्णवर्ण- स्तुति-प्रियाम् । वरदाभयदां देवीं वन्दे त्वां कमलेक्षणे ।।8
अम्ब प्रसीद करूणा-परिपूर्ण-दृष्ट्या  माँ त्वत्कृपाद्रविणगेहमिमं कुरुष्व ।
आलोकय प्रणत-हृद्गत-शोकहन्त्रि  त्वत्पाद-पद्मयुगलं  प्रणमाम्यहं श्रीः ।।9
शान्त्यै नमोऽस्तु शरणागत-रक्षणायै  कान्त्यै नमोऽस्तु कमनीय-गुणाश्रयायै ।
क्षान्त्यै नमोऽस्तु दुरितक्षय-कारणायै  धात्र्यै नमोऽस्तु धन-धान्य-समृद्धिदायै ।।10
शक्त्यै नमोऽस्तु शशिशेखर-संस्थितायै  रत्यै नमोऽस्तु रजनीकर-सोदरायै ।
भक्त्यै नमोऽस्तु भवसागर तारकायै  मत्यै नमोऽस्तु मधुसूदन-वल्लभायै ।।11
लक्ष्म्यै नमोऽस्तु शुभलक्षण-लक्षितायै  सिद्ध्यै नमोऽस्तु सुरसिद्ध सुपूजितायै ।
धृत्यै नमोऽस्तु मम दुर्गति-भञ्जनायै  गत्यै नमोऽस्तु वरसद्गति-दायकायै ।।12
देव्यै नमोऽस्तु दिवी देवगणार्चितायै  भूत्यै नमोऽस्तु भुवनार्ति-विनाशनायै ।
शान्त्यै नमोऽस्तु धरणीधर वल्लभायै  पुष्ट्यै नमोऽस्तु पुरूषोत्तम-वल्लभायै ।।13
सुतीव्र-दारिद्र्य-तमोपहन्त्र्यै  नमोऽस्तु ते सर्व-भयापहन्त्र्यै ।
श्रीविष्णु-वक्षस्थल-संस्थितायै  नमो नमः सर्व विभूति दायै ।।14
जयतु जयतु लक्ष्मी लक्षणालङ्कृताङ्गी  जयतु जयतु पद्मा पद्मसद्माभिवन्द्या ।
जयतु जयतु विद्या विष्णु वामाङ्कसंस्था  जयतु जयतु सम्यक् सर्व सम्पत्करी श्रीः ।।15
जयतु जयतु देवी देवसङ्घाभिपूज्या  जयतु जयतु भद्रा भार्गवी भाग्यरूपा ।
जयतु जयतु नित्या निर्मलज्ञानवेद्या  जयतु जयतु सत्या सर्वभूतान्तरस्था ।।16
जयतु जयतु रम्या रत्नगर्भान्तरस्था  जयतु जयतु शुद्धा शुद्धजाम्बूनदाभा ।
जयतु जयतु कान्ता  कान्तिमद्भासिताङ्गी  जयतु जयतु शान्ता शीघ्रमागच्छ-सौम्ये ।।17
यस्याः कलायाः कमलोद्भवाद्या  रूद्राश्च शक्रप्रमुखाश्च देवाः ।
जीवन्ति सर्वेऽपि सशक्तयस्ते  प्रभुत्वमाप्ताः परमायुषस्ते ।।18
●।।।।मुख बीजम् ।।।।ॐ ह्रां  ह्रीं अं आं यं दुं लं वम् ।।
लिलिखे निटिले विधिर्मम लिपिविसृज्यान्तरं  त्वया विलिखितव्यमेतदिति तत्फलप्राप्तये ।
तदन्तिकफल्स्फुटं कमलवासिनि श्रीरिमां  समर्पय स्वमुद्रिकां सकलभाग्यसंसूचिकाम् ।।19
●।।।पादबीजम्।।।ॐ अं आं ईं एं ऐं कं लं रं ।।।
कलया ते यथा देवि जीवन्ति सचराचराः । तथा सम्पत्करी लक्ष्मि सर्वदा सम्प्रसीद मे ।।20
यथा विष्णुर्ध्रुवं नित्यं स्वकलां संन्यवेशयत् । तथैव स्वकलां लक्ष्मि मयि सम्यक् समर्पय ।।21
सर्वसौख्यप्रदे देवि भक्तानामभयप्रदे । अचलां कुरू यत्नेन कलां मयि निवेशिताम् ।।22
मुदास्तां मत्फालं परमपदलक्ष्मीः स्फुटकला  सदा वैकुण्ठश्रीर्निवसतु कला मे नयनयोः ।
वसेत्सत्ये लोके मम वचसि लक्ष्मीर्वरकला  श्रियश्वेतद्वीपे निवसतु कला मे स्व-करयोः ।।23
●।।।नेत्रबीजम् ।।।ॐ घ्रां घ्रीं घ्रें घ्रैं घ्रों घ्रौं घ्रं घ्रः ।।
तावन्नित्यं ममाङ्गेषु क्षीराब्धौ श्रीकला वसेत् । सूर्याचन्द्रमसौ यावद्यावल्लक्ष्मीपतिः श्रियौ ।। 24
अज्ञानतिमिरं हन्तुं शुद्वज्ञानप्रकाशिका । सर्वैश्वर्यप्रदा मेऽस्तु त्वत्कला मयि संस्थिता ।।25
सर्वमङ्गलसम्पूर्णा सर्वैश्वर्यसमन्विता । आद्यादि श्रीर्महालक्ष्मीस्त्वत्कला मयि तिष्ठतु ।।26
अलक्ष्मीं हरतु क्षिप्रं तमः सूर्यप्रभा यथा । वितनोतु मम श्रेयस्त्वत्कला मयि संस्थिता ।।27
ऐश्वर्यमङ्गलोत्पत्तिः त्वत्कलां निधीयते । मयि तस्मात्कृतार्थोऽस्मि पात्रमस्मि स्थितेस्तव ।।28
भवदावेशभाग्यार्हो भाग्यवानस्मि भार्गवि । त्वत्प्रसादात्पवित्रोऽहं  लोकमातर्नमोऽस्तु ते ।।29
पुनासि मां त्वत्कलयैव यस्मात्  अतस्समागच्छ ममाग्रतस्त्वम् ।
परं पदं श्रीर्भव सुप्रसन्ना  मय्यच्युतेन प्रविशादिलक्ष्मीः ।।30
श्रीवैकुण्ठस्थिते लक्ष्मि समागच्छ ममाग्रतः । नारायणेन सह मां कृपादृष्ट्याऽवलोकय ।।31
सत्यलोकस्थिते लक्ष्मि त्वं ममागच्छ सन्निधिम् । वासुदेवेन सहिता प्रसीद वरदा भव ।।32
श्वेतद्वीपस्थिते लक्ष्मि शीघ्रमागच्छ सुव्रते । विष्णुना सहिता देवि जगन्मातः प्रसीद मे ।।33
क्षीराम्बुधिस्थिते लक्ष्मि समागच्छ समाधवे । त्वत्कृपादृष्टिसुधया सततं मा विलोकय ।।34
रत्नगर्भस्थिते लक्ष्मि परिपूर्णहिरण्यमयि । समागच्छ समागच्छ स्थित्वाशु पुरतो मम ।।35
स्थिरा भव महालक्ष्मि निश्चला भव निर्मले । प्रसन्नकमले देवि प्रसन्नहृदया भव ।।36
श्रीधरे श्रीमहालक्ष्मि त्वदन्तःस्थं महानिधिम् । शीघ्रमुद्धृत्य पुरतः प्रदर्शय समर्पय ।।37
वसुन्धरे श्रीवसुधे वसुदोग्ध्रि कृपामयि । त्वत्कुक्षिगतसर्वस्वं शीघ्रं मे सम्प्रदर्शय ।।38
विष्णुप्रिये रत्नगर्भे समस्तफलदे शिवे । त्वद्गर्भगतहेमादीन् सम्प्रदर्शय दर्शय ।।39
रसातलगते लक्ष्मि शीघ्रमागच्छ मे पुरः । न जाने परमं रूपं मातर्मे सम्प्रदर्शय ।।40
आविर्भव मनोवेगात् शीघ्रमागच्छ मे पुरः । मा वत्स भैरिहेत्युक्त्वा कामं गौरिव रक्ष माम् ।।41
देवि शीघ्रं ममागच्छ धरणीगर्भसंस्थिते । मातस्त्वद्भृत्यभृत्योऽहं  मृगये त्वां कुतूहलात् ।।42
उत्तिष्ठ जागृहि त्वं मे समुत्तिष्ठ सुजागृहि । अक्षयान् हेमकलशान् सुवर्णेन सुपूरितान् ।।43
निक्षेपान्मे समाकृष्य समुद्धृत्य ममाग्रतः । समुन्नतानना भूत्वा सम्यग्धेहि धरातलात् ।।44
मत्सन्निधिं समागच्छ मदाहितकृपारसा । प्रसीद श्रेयसां दोग्ध्रि लक्ष्मि मे नयनाग्रतः ।।45
अत्रोपविश्य लक्ष्मि त्वं स्थिरा भव हिरण्मयी । सुस्थिरा भव सम्प्रीत्या प्रसन्ना वरदा भव ।।46
आनीतांस्तु  त्वया देवि निधीन्मे सम्प्रदर्शय । अद्य क्षणेन सहसा दत्त्वा संरक्ष मां सदा ।।47
मयि तिष्ठ तथा नित्यं यथेन्द्रादिषु तिष्ठसि । अभयं कुरु मे देवि महालक्ष्मि नमोऽस्तु ते ।।48
समागच्छ महालक्ष्मि शुद्धजाम्बूनद-स्थिते । प्रसीद पुरतः स्थित्वा प्रणतं मां विलोकय ।।49
लक्ष्मीर्भुवं गता भासि यत्र यत्र हिरण्यमयी । तत्र तत्र स्थिता त्वं मे तव रूपं प्रदर्शय ।।50
क्रीडन्ती बहुधा भूमौ परिपूर्णकृपा मयि । मम मूर्धनि ते हस्तमविलम्बितमर्पय ।।51
फलतद्भाग्योदये लक्ष्मि समस्तपुरवासिनि । प्रसीद मे महालक्ष्मि परिपूर्णमनोरथे ।।52
अयोध्यादिषु सर्वेषु नगरेषु समास्थिते । विभवैर्विविधैर्युक्तैः समागच्छ मुदान्विते ।।53
समागच्छ समागच्छ ममाग्रे भव सुस्थिरा । करुणारसनिष्यन्दनेत्रद्वयविशालिनि ।।54
सन्निधत्स्व महालक्ष्मि त्वत्पाणिं मम मस्तके । करुणासुधया मां त्वमभिषिच्य स्थिउरं कुरु ।।55
सर्वराजगृहे लक्ष्मि समागच्छ बलान्विते । स्थित्वाऽऽशु पुरतो मेऽद्य प्रसादेनाभयं कुरु ।।56
सादरं मस्तके हस्तम् मम त्वं कृपयाऽर्पय ।सर्वराजस्थिते लक्ष्मी त्वत्कला मयि तिष्ठतु ।।57
आद्यादि श्रीर्महालक्ष्मि विष्णुवामाङ्कसंस्थिते । प्रत्यक्षं कुरु मे रूपं रक्ष मां शरणागतम् ।।58
प्रसीद मे महालक्ष्मि सुप्रसीद महाशिवे । अचला भव सुप्रीता सुस्थिरा भव मद्गृहे ।।59
यावत्तिष्ठन्ति वेदाश्च यावच्चन्द्र-दिवाकरौ । यावद्विष्णुश्च यावत्तवं तावत्कुरू कृपा मयि ।।60
चान्द्री कला यथा शुक्ले वर्धते सा दिने दिने । तथा दया ते मय्येव वर्धतामभिवर्धताम् ।।61
यथा वैकुण्ठनगरे यथा वै क्षीरसागरे । तथा मद्भवने तिष्ठ स्थिरं श्रीविष्णुना सह ।।62
योगिना हृदये नित्यं यथा तिष्ठसि विष्णुना । तथा मद्भवने तिष्ठ स्थिरं श्रीविष्णुना सह ।।63
नारायणस्य हृदये भवती यथाऽऽस्ते  नारायणोऽपि तव हृत्कमले यथाऽऽस्ते ।
नारायणस्त्वमपि नित्यविभू तथैव  तौ तिष्ठतां हृदि ममापि दयान्वितौ श्रीः ।।64
विज्ञानवृद्धिं हृदये कुरु श्रीः  सौभाग्यवृद्धिं कुरु मे गृहे श्रीः ।
दयासुवृद्धिं कुरूतां मयि श्रीः  सुवर्णवृद्धिं कुरु मे गृहे श्रीः ।।65
न मां त्यजेथाः श्रितकल्पवल्लि सद्भक्ति-चिन्तामणि-कामधेनो ।
न मां त्यजेथा भव सुप्रसन्ने गृहे कलत्रेषु च पुत्रवर्गे ।।66
●।।।।।कुक्षिबीजम्।।।ॐ अं  आं ईं एं ऐं ।।
आद्यादिमाये त्वमजाण्डबीजं    त्वमेव  साकार-निराकृती त्वम् ।
त्वया धृताश्चाब्जभवाण्डसङ्घाः  ह्चित्रं चरित्रं तव देवि विष्णोः ।।67
ब्रह्मरुद्रादयो देवा वेदाश्चापि न शक्नुयुः । महिमानं तव स्तोतुं मन्दोऽहं शक्नुयां कथम् ।।68
अम्ब त्वद्वत्सवाक्यानि सूक्तासूक्तानि यानि च । तानि स्वीकुरू सर्वज्ञे दयालुत्वेन सादरम् ।।69
भवन्तं शरणं गत्वा कृतार्थाः स्युः पुरातनाः । इति सञ्चिन्त्य मनसा त्वामहं शरणं व्रजे ।।70
अनन्ता नित्यसुखिनः त्वद्भक्तास्त्वत्परायणाः। इति वेदप्रमाणाद्धि देवि त्वां शरणं व्रजे ।।71
तव प्रतिज्ञा मद्भक्ता न नश्यन्तीत्यपि क्वचित् । इति सञ्चिन्त्य सञ्चिन्त्य प्राणान् सन्धारयाम्हम् 72
त्वदधीनस्त्वहं मातः त्वतकृपा मयि विद्यते । यावत्सम्पूर्णकामः स्यां तावद्देहि दयानिधे ।।73
क्षणमात्रं न शक्नोमि जीवितु त्वत्कृपा विना । न हि जीवन्ति जलजा जलं त्यक्त्वा जलाश्रयाः ।74
यथा हि पुत्रवात्सल्यात् जननी प्रस्नुतस्तनी । वत्सं त्वरितमागत्य सम्प्रीणयति वत्सला ।।75
यदि स्यां तव पुत्रोऽहं   माता त्वं यदि  मामकी। दयापयोधर स्तन्य सुधाभिरभिषिञ्च माम् ।।76
मृग्यो न गुणलेशोऽपि मयि दोषैक-मन्दिरे । पांसूनां वृष्टिबिन्दूनां दोषाणां च न मे मतिः ।।77
पापिनामहमेकाग्रो दयालुनां त्वमग्रणीः । दयनीयो मदन्योऽस्ति तव जगत्त्रये ।।78
विधिनाहं न सृष्टश्चेत् न स्यात्तव दयालुता । आमयो वा न सृष्टश्चेदौषधस्य वृथोदयः  ।79
कृपा मदग्रजा किं ते अहं किं वा तदग्रजः । विचार्य देहि मे वित्तं तव देवि दयानिधे ।।80
माता-पिता त्वं गुरुः सद्गतिः श्रीः  त्वमेव सञ्जीवनहेतुभूता ।
अन्यं न मन्ये जगदेकनाथे  त्वमेव सर्वं मम देवि सत्यम ।।81
●।।।।हृदयबीजम्।।।ॐघ्रां घ्रीं घ्रूं घ्रें घ्रों घ्रः हुं फट् कुरू कुरू स्वाहा ।।
आद्यादि लक्ष्मी भव सुप्रसन्ना विशुद्धविज्ञानसुखैकदोग्ध्रि ।
अज्ञानहन्त्री त्रिगुणातिरिक्ता  प्रज्ञाननेत्री भव सुप्रसन्ना ।।82
अशेषवाग्जाड्य-मलापहन्त्री  नवं नवं सुष्टु सुवाक्यदायिनी ।
ममैव जिह्वाग्रसुरङ्गवर्तिनी  भव प्रसन्ना वदने च मे श्रीः ।।83
समस्तसम्पत्सु विराजमाना समस्ततेजस्तु विभासमाना ।
विष्णुप्रिये त्वं भव दीप्यमाना वाग्यदेवता मे नयने प्रसन्ना ।।84
सर्वप्रदेशे सकलार्थदे त्वं  प्रभासुलावण्यदयाप्रदोग्ध्रि ।
सुवर्णदे त्वं सुमुखी भव  श्रीर्हिरण्यमयी मे नयने प्रसन्ना ।।85
सर्वार्थदा सर्वजगतत्प्रसूतिः सर्वेश्वरी सर्वभयापहन्त्री ।
सर्वोन्नता त्वं सुमुखी च नः  श्रीर्हिरण्यमयी मे भव सुप्रसन्ना ।।86
समस्त विघ्नौघ विनाशकारिणी  समस्त भक्तोद्धरणे विचक्षणा ।
अनन्तसम्मोद सुखप्रदायिनी  हिरण्यमयी मे नयने प्रसन्ना ।।87
देवि प्रसीद दयनीयतमाय मह्यं  देवाधिनाथ-भव देवगणाभिवन्द्ये ।
मातस्तथैव भव सन्निहिया दृशोर्मे  पत्या समं मम मुखे भव सुप्रसन्ना ।।88
मा वत्स भैरभयदानकरोऽर्पितस्ते  मौलौ ममेति मयि दीनदयानुकम्पे ।
मातः समर्पय मुदा करूणाकटाक्षं  माङ्गल्यबीजमिह नः सृज जन्म मातः ।।89
●।।।कण्ठबीजम् ।।।ॐ श्रां श्रीं श्रूं श्रैं श्रौं  श्रं श्राः  ।।।
कटाक्ष इह कामधुक् तव मनस्तु चिन्तामणिः  करः सुरतरूः सदा नवनिधिस्त्वमेवेन्दिरे ।
भवेत्तव दयारसो मम रसायनं चान्वहं  मुखं तव कलानिधिर्विविधवाञ्छितार्थप्रदम् ।।90
यथा रसस्पर्शनतोऽयसोऽपि सुवर्णता  स्यात्कमले तथा ते ।
कटाक्षसंस्पर्शनतो जनानां  अमङ्गलानामपि मङ्गलत्वम् ।।91
देहीति नास्तीति वचः प्रवेशाद्  भीतो रमे त्वां शरणं प्रपद्ये ।
अतः सदास्मिन्नभयप्रदा त्वं  सहैव पत्या मयि सन्निधेहि ।।92
कल्पद्रुमेण मणिना सहिता सुरम्या  श्रीस्ते कला मयि रसेन रसायनेन ।
आस्तामतो मम च दृक्करपाणिपाद- स्पृष्ट्याः सुवर्णवपुषः स्थिरजङ्गमाः स्युः ।।93
आद्यादि विष्णोः स्थिरधर्मपत्नी  त्वमेव पत्या मम सन्निधेहि ।
आद्यादिलक्ष्मि त्वदनुग्रहेण  पदे पदे मे निधिदर्शनं स्यात् ।।94
आद्यादिलक्ष्मीहृदयं पठेद्यः  स राज्यलक्ष्मीमचलां तनोति ।
महादरिद्रोऽपि भवेद्धनाढयः  तदन्वये श्रीः स्थिरतां प्रयाति ।।95
यस्य स्मरणमात्रेण तुष्टा स्याद्विष्णुवल्लभा । तस्याभीष्टं ददत्याशु तं पालयति पुत्रवत् ।।96
इदं रहस्यं हृदयं सर्वकामफलप्रदम् । जपः पञ्चसहस्रं तु पुरश्चरणमुच्यते ।।97
त्रिकालं एककालं वा नरो भक्तिसमन्वितः । यः पठेत् शृणुयाद्वापि स याति परमां श्रियम् ।।98
महालक्ष्मीं समुद्दिश्य निशि भार्गववासरे । इदं श्रीहृदयं जपत्वा पञ्चवारं धनी भवेत् ।।99
अनेन हृदयेनान्नं गर्भिण्या अभिमन्त्रितम् । ददाति तत्कुले पुत्रो जायते श्रीपतिः स्वयम् ।।100
नरेणाप्यथवा नार्या लक्ष्मीहृदयमन्त्रिते । जले पीते च तद्वंशे मन्दभाग्यो न जायते ।।101
य आश्वयुङ्मासि च शुक्लपक्षे  रमोत्सवे सन्निहिते च भक्त्या ।
पठेत्तथैकोत्तरवारवृद्ध्या  लभेत्स सौवर्णमयीं सुवृष्टिम् ।।102
य एकभक्य्याऽन्वहमेकवर्षं विशुद्धधीः  सप्ततिवारजापी ।
स मन्दभाग्योऽपि रमाकटाक्षात्  भवेत्सहस्राक्षशताधिकश्रीः ।।103
श्रीशांघ्रिभक्ति हरिदासदास्यं  प्रपन्नमन्त्रार्थदृढैकनिष्ठाम् ।
गुरोः स्मृतिं निर्मलबोधबुद्धिं ,  प्रदेहि मातः परमं पदं श्रीः ।।104
पृथ्वीपतित्वं पुरूषोत्तमत्वं विभूतिवासं विविधार्थसिद्धिम् ।
सम्पूर्णकीर्तिं बहुवर्षभोगं  प्रदेहि मे देवि पुनःपुनस्त्वम् ।।105
वादार्थसिद्धिं बहुलोकवश्यं  वयःस्थिरत्वं ललनासु भोगम् ।
पौत्रादिलब्धिं सकलार्थसिद्धिं  प्रदेहि मे भार्गवि जन्मजन्मनि ।।106
सुवर्णवृद्धिं कुरु मे गृहे श्रीः  विभूतिवृद्धिं कुरु मे गृहे श्रीः ।
कल्याणवृद्धिं कुरु मे गृहे श्रीः  विभूतिवृद्धिं कुरु मे गृहे श्रीः ।।107
●।।।शिरोबीजम् ।।।ॐ यं  हं कं लं वं श्रीम्।।।
ध्यायेल्लक्ष्मीं प्रहसितमुखीं कोटिबालार्कभासां  विद्युत्वर्णाम्बरवरधरां भूषणाढ्यां सुशोभाम् ।
बीजापूरं सरसिजयुगं बिभ्रतीं सुवर्णपात्रं  भर्त्रायुक्तां मुहुरभयदां मह्यमप्यच्युतश्रीः ।।108

।इति श्रीअथर्वणरहस्ये लक्ष्मीहृदयस्तोत्रं सम्पूर्णम् ।।
                           ।।ॐ तत्सत ।।
                       ।।नारायण हृदयम् ।।
Jay Sri Radhe.